Маңғыстауда «Ақтау теңіз порты» арнайы экономикалық аймағын дамыту мәселелері талқыланды

Облыс басшысы Нұрлан Ноғаев «Ақтау теңіз порты» АЭА аумағында жұмыс сапарымен болды, деп хабарлайды mangystaumedia.kz Маңғыстау облысы әкімінің баспасөз қызметіне сілтеме жасап.

Сапар барысында облыс әкімі «Ақтау теңіз порты» АЭА қызметімен танысты. АЭА құрамындағы объектілерді, соның ішінде іске асып жатқан жобаларды аралады.

Атап айтқанда, 28 млрд теңге инвестиция салынған каустикалық сода және құрамында хлоры бар өнімдер шығаратын зауыт, инвестициясы 1,7 млрд теңгеге химиялық өнімдер шығаратын зауыт, 1,1 млрд теңгеге биг-бэгтердің жұмсақ қаптама ыдысын өндіру зауыты және 14,2 млрд теңге инвестицияға сорғы штангілер мен оған қажетті муфталар шығаратын зауытты аралады.

Сондай-ақ аймақ басшысы 2017 жылы іске қосылған «KAZAKHSTAN PIPE THREADERS» (Tenaris) ЖШС премиум класты газ өткізбейтін бұрандалы құбырлар шығаратын зауыттың жұмысымен танысты. Жоба нәтижесінде 70 жұмыс орны ашылды.

Сонымен қатар Нұрлан Ноғаев 2016 жылы іске қосылған жемістер, көкөністер және азық-түлік өнімдерін сақтайтын «Азерсун» өндіріс және логистика орталығын аралады. Орталықтың жұмыс көлемімен және орталық базасында 2020 жылы құрылған әлеуметтік маңызы бар азық-түлік өнімдерін сақтау бойынша тұрақтандыру қорының жағдайымен танысты. Жобаның құны - 4,6 млрд теңге.

Соңғы мәліметтерге сәйкес, «Ақтау теңіз порты» АЭА инвестициясының жалпы көлемі 285,3 млрд теңге, оның ішінде шетелдік инвестиция – 169 млрд теңге. 411,4 млрд теңгенің өнімі өндірілді, 1377-ден астам жұмыс орны ашылды, салық төлемдерінің көлемі 54,8 млрд.теңгеге жетті. Сонымен қатар 2,7 млрд.теңгеге өнім экспортталды.

1 теңге бюджеттік инвестицияға 36,6 теңге жеке инвестиция тартылып, 7,1 теңге салық аударымы төленді.

АЭА-ның 50 қатысушысы тіркелді, оның ішінде 20 жоба іске асты, ал 30 жоба қазіргі таңда іске асып жатыр

Жұмыс сапарының қорытындысы бойынша Нұрлан Ноғаев арнайы экономикалық аймақ аумағында орналасқан компаниялар экономиканың дамуына үлес қосуы керектігін атап өтіп, бірқатар нақты тапсырма берді.

– АЭА аумағында жобаларды жүзеге асыру өңір экономикасын әртараптандыруға, қосымша жұмыс орындарын құруға, бюджет кірістерін арттыруға мультипликативті әсер береді. Қосымша құрылыс индустриясын, жол инфрақұрылымын және өңірде оң әлеуметтік-экономикалық нәтиже беретін басқа да салаларды дамыту қажет, - деді Нұрлан Ноғаев.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.