Mańǵystaý Media
16+
Редакция
+7 (7292) 20 48 34
hat@mangystaumedia.kz
Жарнама бөлімі
+7 778 145 90 93
reklama@mangmedia.kz
Маңғыстау облысы бойынша балық инспекциясы басқармасының инспекторлары Түпқараған ауданы Каспий теңізінің жағалауынан 15 итбалық пен 4 бекіре балығының өлексесін тапты, деп хабарлайды mangystaumedia.kz.
-Мониторинг барысында Маңғыстау облысы бойынша балық инспекциясы басқармасының Жайық-Каспий облысаралық балық шаруашылығы бассейндік инспекциясының мемлекеттік инспекторлары 2023 жылғы 6 мамырда жергілікті уақыт бойынша сағат 19:00 шамасында келіп түскен ақпарат бойынша Түпқараған ауданы, Баутино ауылының Каспий теңізінің жағалауынан 15 дана итбалық пен 4 дана бекіре балығының ұшасы табылды, - деп хабарлады ведомство.
Аталған факт бойынша құрамында әкімдік, мамандандырылған ғылыми ұйымдар, Каспий итбалығын зерттеу және оңалту орталығы, гидробиология және экология институты, қазақстандық Қолданбалы Экология Агенттігі, Микробиология және вирусология ғылыми-өндірістік орталығы, облыстың ветеринарлық қызметі, экология және полиция департаменттері, табиғат қорғау прокуратурасы өкілдері бар жұмыс тобының мүшелері хабардар етілді.
- Теңіз жануарларын табу фактісі бойынша 2023 жылғы 6 мамырда Маңғыстау облысы Түпқараған ауданының полиция бөлімі қылмыстық іс қозғады, оның шеңберінде жануарлардың өлімінің себептері мен басқа да мән-жайлары анықталатын болады, - деп хабарлады балық инспекциясы.
Келесі күні, 7 мамырда итбалықтар табылған жерге Жайық-Каспий облысаралық балық шаруашылығы бассейндік инспекциясының Маңғыстау облысы бойынша экология департаментінің, ветеринариялық инспекцияның, Қазгидрометтің және жергілікті атқарушы органдардың өкілдерінен тұратын жұмыс тобы шықты.
- Маңғыстау облысы бойынша экология департаменті анықталған жерден су мен ауа сынамаларын алды. Табылған теңіз жануарларының өлекселерінің көпшілігі қатты ыдырау сатысында болғандықтан, өлімнің себептерін анықтау үшін гистологиялық сынамаларды алу мүмкін болмады, - деп хабарлады инспекция.
Жайық-Каспий облысаралық бассейндік балық шаруашылығы инспекциясының қызметкерлері Каспий теңізінің жағалау аймағының мониторингін жалғастыруда.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.