Ақтауда 400-ге жуық жас кітап кешіне қатысты

Ақтауда «Jastar boоks» жобасы аясында «Kitap al» компаниясының HR директоры Данияр Жігітбектің қатысуымен кітап кеші өтті, деп хабарлайды mangystaumedia.kz Қоғамдық коммуникация орталығына сілтеме жасап.

Ұйымдастырушы тарап танымдық кездесу жастардың кітапқа деген сүйіспеншілігін арттыру мақсатында жүзеге асырылғандығын мәлімдеді.

- Терең білімді, көзқарас көкжиегі, ой өрісі кең жастар- өркениет өріндегі елдердің басты құндылығы. Ал кітап-білім бұлағы. Ұдайы кітап оқу сыни ойлау қабілетін арттырады. Білімге ұмтылысы зор ұрпақтың кітап оқуға құлшынысы артуы заңдылық, - дейді Маңғыстау облыстық Жастар ресурстық орталығының жастар жобалары мен бағдарламаларды іске асыру бөлімінің басшысы Наурызгүл Тәжәдин.

Іс-шара аясында бүгінде көпшілік сұранысына ие кітаптар жәрмеңкесі өтті. Сондай-ақ белгілі жас жазушы Данияр Жігітбек пен жылдам оқу тәсілдерін терең меңгерген Арай Рахметова тұрғындармен кездесіп, өзара қызық сұхбат құрды.

- Біздің аудиторияның басым бөлігі- жастар. Жас буынның кітап оқуға қызығушылығын арттыру, үздіксіз ізденіске баулу - компаниямыздың басты миссиясы. Бүгінгі шараның да мәні осында. Мен 3 кітаптың авторымын. «Қаржы қағидалары» атты жинақта халықтың қаржылық сауатын арттыру мәселесі қозғалады. Бүгінде отбасы бюджетін негізсіз жоспарлау бірқатар ауқымды мәселелердің туындауына сеп болып отыр. Сондықтан бұл кітаптың қоғамға тигізер пайдасы зор, - дейді Данияр Жігітбек.

Іс-шараға 400-ге жуық адам қатысты. Кітап кешінде Арай Рахметова жылдам оқудың қыр-сыры жайлы қызық оқиғаларды баяндады.

- Кітап оқу үшін де мақсат керек. Мақсатыңыз айқын болмаса, зейін де болмайды. Бір кітапты бүгін немесе 1 аптада бітіремін деген талап қою маңызды. Дауыстап емес, көзбен оқыңыз. Ал балаға кітап оқыту үшін мотивация беру керек. Facebook әлеуметтік желісінің директоры Марк Цукербергте бастапқыда сабақтан екі алған, бірақ анасы келесіде үш аласың деумен мотивация берген екен. Жақын жандарының сенімі әрі қолдауы арқасында өз мүмкіндіктерін шыңдап, ол әлемге танылды, - дейді Арай Рахметова.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.