Министр Алматы облысындағы екі оқушының өліміне қатысты мәлімдеме жасады

Оқу-ағарту министрі Ғани Бейсембаев мұғалімдер мен ата-аналарға үндеу жасады, деп хабарлайды mangystaumedia.kz.

Министр оқушылар арасында кеңіне етек алған келеңсіз оқиғаларына қатысты пікір білдіріп, оған қатысты мәселе қаралатынын атады.

«Соңғы уақытта жасөспірімдер арасында жәбірлеу жағдайлары жиілеп отыр. Түркістан, Атырау, Шығыс Қазақстан, Қызылорда облыстарында болған оқиғалар ешкімді бей-жай қалдырмағаны белгілі. Алматы облысындағы екі баланың өліміне себеп болған қайғылы оқиға жаныма қатты батып отыр. Балалардың туыстары мен жақындарына қайғырып көңіл айтамын.

Бір өкініштісі жәбірлеу кең таралған құбылыстардың біріне айналып бара жатыр. Жасөспірімдердің жан түршігерлік қылығы мен бір-біріне қатыгездік танытуы ақылға сыймайтын дүние. Бізге - педагогтер қоғамдастығы мен азаматтық қоғам, ата-аналар – балалардың өмірі мен денсаулығын қорғауға, өскелең ұрпақтың өміріне демеу болар құндылықтарын қалыптастыру жолында бүкіл ресурсымызды жұмылдырып, бала тәрбиесінде бірлесе қимыл жасау қажеттілігі туындап отыр, деді Ғани Бейсембаев.

Оның айтынша, қазіргі уақытта білім басқармаларының, аумақтық департаменттердің, қалалық және аудандық білім бөлімдерінің басшыларымен шұғыл кеңес өткен. Тәрбие жұмысы және ата-аналар жұртшылығымен өзара іс-қимылды күшейту бойынша тапсырмалар беріліп, ішкі істер министрімен және әкімдікпен байланыс орнатылған. Сонымен бірге, жергілікті жерде құқық қорғау органдары тергеу іс-шараларын жүргізуде, комиссия жұмыс істеп жатыр.

«Мемлекет басшысының тапсырмасы бойынша балаларды зорлық-зомбылықтан қорғау, суицидтің алдын алу, олардың құқықтары мен әл-ауқатын қамтамасыз ету жолындағы кешенді жоспар әзірлеу жөнінде бірқатар жұмыс атқарылып жатыр. Министрлік заңнамалық базаны жетілдіру жұмысын да жүргізіп келеді. Баланың жәбірленуден қорғануға құқығы бекітілді. Ол үшін Балалар арасындағы жәбірлеудің алдын алу ережесі, Мектептердің психология қызметтің жұмыс ережесі, Балаларға қатысты зорлық-зомбылық пен қатыгездік фактілерін анықтау және олармен жұмыс істеу алгоритмі қабылданды. Еліміздің әр өңірінде Бала құқықтары жөніндегі уәкілдер жұмыс істеуде. Олардың байланыс нөмірлері @oqu_agartu_ministrligi парақшасында жарияланған. Балалар мен ата-аналарға жедел көмек көрсету үшін «Бала қорғау» телеграм-чаты жұмыс істеп тұр. Осы шаралардың бәрі балалардың қауіпсіздігін қамтамасыз етуде бірыңғай тәсілдерді қалыптастыруды көздейді», деді министр.

Алда уақытта да балалардың қауіпсіздігі ҚР Оқу-ағарту министрлігі жұмысының ең маңызды бағыты әрі басты назарында болып қала береді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.