Достық үйінде өңір басшысы Нұрлан Ноғаевтың қатысуымен тұрмыстық зорлық-зомбылық және кәмелетке толмағандардың құқықтарын қорғау мәселелері жөніндегі үйлестіру кеңесінің отырысы өтті, деп хабарлайды mangystaumedia.kz сайты Маңғыстау облысы әкімінің баспасөз қызметіне сілтеме жасап.
Отырысқа облыс прокуроры Руфат Құттықов, облыстық мәслихат төрағасы Жаңбырбай Матаев, полиция департаментінің бастығы, полиция генерал-майоры Аян Дүйсембаев, ҚР Сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің басшысы Шамұрайт Шаменов, үйлестіру кеңесінің мүшелері, бала және адам құқықтары жөніндегі уәкілдердің өкілдері, сондай-ақ уәкілетті органдардың басшылары қатысты.
Облыс прокуроры Руфат Құттықовтың айтуынша, 11 айдың қорытындысы бойынша облыс аумағында тұрмыстық зорлық-зомбылықтың өсуі 31%-ға тең.
«Бұрын мемлекеттік органдар тарапынан тексеру жәбірленуші тараптың шағымынан кейін ғана жүзеге асырылды, енді заңға түзетулер енгізілгеннен кейін тексеру куәгерлердің сигналдары бойынша жүзеге асырылуы мүмкін. Сондықтан, егер, біз тұрмыстық зорлық-зомбылық туралы құқық қорғау органдарына уақытында хабарласақ, әрқайсымыз біреудің өмірін сақтап қалуымыз мүмкін», – деп атап өтті Руфат Құттықов.
Өңірде тұрмыстық зорлық-зомбылық құрбандарына қолдау көрсететін мемлекеттік және жеке 2 ұйым бар. Олардың бірі — №2 арнайы қызмет көрсету орталығы, ал екіншісі – қарттар үйінің ғимаратында орналасқан "Рай" орталығы. Биылғы жылы осы орталықтардан 58 баламен бірге 24 әйел көмек сұрады. Зорлық-зомбылықтан зардап шеккен адамдар осы орталықтарда 3 айдан 6 айға дейін тұра алады. Сонымен қатар полициядан анықтама ұсынған кезде әлеуметтік қолдау ала алады.
«Облыс бойынша екі мыңға жуық отбасылық тиран есепте тұр. Өкінішке қарай, бұл отбасыларда балалар зардап шегеді. Әкесі үш баласын бұрынғы әйеліне деген қызғаныштан өлтіріп, осылайша кек алуды көздеген жағдай белгілі. Есірткіні тарату мәселесі де – өткір тақырып. Прокуратура қызметкерлері балалармен есірткінің зияны, заңның бұзылуы және адам өмірінің құндылығы туралы әңгімелесетін білім беру мекемелеріне үнемі барады. Балалардағы жағымсыз мінез-құлық белгілерін анықтаған кезде біз оларға моральдық-психологиялық көмек көрсетеміз. Бұл жұмыс жалғаса береді», - деді Руфат Құттықов.
Сонымен қатар Маңғыстау облысы прокурорының айтуынша, 2023 жылы полиция балаларды қараусыз қалдырғаны үшін ата-аналарды әкімшілік жауапкершілікке тартудың 5700-ге жуық жағдайын тіркеген.
Кәмелетке толмағандарға көмек пен қолдау көрсететін "BALA QORǴAU" телеграм-чат арнасы және "111" сенім телефоны бар.
«Соңғы үш жылда қамқорлықсыз қалған, үйден қашып кеткен немесе өмірлік қиын жағдайға тап болған балаларға көмектесетін біздің өңірдегі кәмелетке толмағандарды бейімдеу орталығына 1140 бала түсті (2021 жылы 409, 2022 жылы 360 және 2023 жылы 371). Оның ішінде 1063 бала отбасына қайтарылды, 68 бала интернат мекемелеріне орналастырылды. Бүгінгі таңда 9 бала қамқорлықта. Биыл ата-ана міндеттерін орындамаған 898 адамға айыппұл салынды, 11 адамның ата-ана құқықтары шектелді, ал 61 адамға бұл құқық берілді»,- деді Маңғыстау облысы білім басқармасының басшысы Динара Жұмашева.
Нұрлан Ноғаев саналы және жауапты азаматтарды қалыптастыру – мемлекеттің басты мақсаттарының бірі екенін атап өтті.
«Біз алдымызға басты міндет қойып отырмыз. Балалар мен жасөспірімдер арасында қылмыстың өсуін болдырмау, сондай-ақ құқық бұзушылық пен зорлық-зомбылықтың алдын алу қажет. Жастарды дұрыс рухта тәрбиелеу — қоғам дамуының маңызды аспектісі. Біздің күш-жігерімізге қарамастан, статистика қылмыстың өсуін және тұрмыстық зорлық-зомбылық, жасөспірімдерге жасалатын жыныстық қатынас, ерте жүктілік және суицид сияқты күрделі мәселелерді көрсетеді. Тұрмыстық зорлық-зомбылық мәселесі ел деңгейінде талқылануда және оны шешу кешенді тәсілді талап етеді, деп атап өтті Мемлекет басшысы. Біз денсаулық сақтау құрылымдарымен ынтымақтастықты жандандырып, суицидолог-мамандар мен балалар психотерапевттерінің санын көбейтуіміз керек. Бүкіл ел бойынша суицидологтардың тапшылығы өте өзекті. Бұл мамандарды біздің өңірге тарту үшін тұрғын үй, субсидиялар және басқа да ынталандыру мүмкіндіктерін қарастыру қажет. Жасөспірімдердің бос уақытын тиімді пайдалануды қамтамасыз ету, мәдени және спорттық іс-шараларды ұйымдастыру, сондай-ақ олардың түрлі үйірмелер мен секцияларға қатысуын қадағалау маңызды»,- деді облыс әкімі.
Үйлестіру кеңесінің нәтижелері бойынша уәкілетті органдар жұмысының тиімділігін арттыруға бағытталған шаралар әзірленді және уәкілетті органдарға нақты тапсырмалар берілді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
