Бүгін, 23 қыркүйекте Маңғыстау облысының әкімі Нұрдәулет Қилыбай Грекияның Пирей қаласының вице мэрі Яннис Моралис бастаған делегациямен кездесті, - деп хабарлайды mangystaumedia.kz
Маңғыстау облысы әкімінің баспасөз қызметінің хабарлауынша, кездесу барысында тараптар қос өңір арасындағы сауда-экономикалық және мәдени-гуманитарлық байланыстарды нығайту, сондай-ақ туризмді дамыту мәселелерін талқылаған.
Вице мэр Яннис Моралис Грекия мен Қазақстан арасындағы достық қатынастарды тереңдетудің қажеттілігін атап өтті. Сондай-ақ Ақтау және Құрық порттары арқылы өтетін Транскаспий маршруттарына қызығушылық танытатындарын білдірді.
Облыс әкімі Нұрдәулет Қилыбай Маңғыстау өңірінің туристік әлеуеті мен инвестициялық мүмкіндіктері туралы айтып, екіжақты ынтымақтастықты нығайтуға бағытталған барлық бастамаларды қолдауға дайын екенін жеткізді.
- Біз Грекиямен қарым-қатынасты дамытуға және жаңа жобаларды жүзеге асыруға дайынбыз. Бұл біздің өңіріміздің экономикалық дамуына және екі ел арасындағы достықты нығайтуға елеулі үлес қосады. Теңіз порттарының дамуы сауда қатынастарымызды одан әрі нығайтуға мүмкіндік береді, - деді Нұрдәулет Қилыбай.
Айта кетейік, Грек Республикасы Маңғыстау облысының сыртқы сауда қатынастарында маңызды рөл атқарады. 2024 жылдың 7 айының қорытындысы бойынша облыстың Грек Республикасымен сыртқы сауда айналымы 178 мың АҚШ долларын құрады. Экспорт 2,6 мың АҚШ долларын, импорт 175,5 мың АҚШ долларын құрады. Экспорт құрылымына жәрмеңке аттракциондары, ал импорт құрылымына мотор майлары, таза спирт, машина жабдықтары мен көлік құралдары кіреді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
