Маңғыстаулық жұмыссыз азаматтар 1 млн 380 мың теңге көлемінде грант ала алады

Business.enbek.kz порталында 2023 жылғы 20 ақпаннан бастап 2021-2025 жылдарға арналған кәсіпкерлікті дамыту жөніндегі ұлттық жоба шеңберінде 1-лек бойынша жаңа бизнес-идеяларды іске асыру үшін мемлекеттік гранттар алуға өтінімдер қабылдау басталады, деп хабарлайды mangystaumedia.kz.

Маңғыстау облысына барлығы 73 грант бөлінген. Грант көлемі 400 АЕК-ті (1 380 000 теңге) құрайды. Әр қатысушы оны тек бір рет ала алады.

Үміткердің «Бастау Бизнес» жобасы бойынша кәсіпкерлік негіздеріне оқыту туралы 3 жылдан аспайтын мерзімге сертификаты болуы тиіс.

Рәсімдердің ашықтығын қамтамасыз ету, адами факторды азайту, өтініш берушілерге ыңғайлы болу үшін гранттар берудің бүкіл процесі электрондық форматқа ауыстырылды. Грант алуға өтінімдерді қабылдау бірыңғай терезе – «Business.enbek.kz» порталы арқылы жүзеге асырылады.

Жаңа бизнес-идеяны іске асыруға мемлекеттік грант алуға үміткер бола алады:

- тіркелген жұмыссыздар;

- жеке кәсіпкерлер (тіркеу мерзімі 3 жылға дейін).

Бұл ретте үміткер төмендегі әлеуметтік санаттардың бірінен болу керек:

- мүгедектігі бар адамдар;

- қолданыстағы «кандас» мәртебесі бар адамдар;

- өңіраралық қоныс аударушылар

- аз қамтылған отбасы мүшелері;

- көпбалалы отбасы мүшесі (жұбайы / зайыбы);

- мүгедектігі бар баланы тәрбиелеп отырған адам (жұбайы / зайыбы);

- асыраушысынан айырылу бойынша жәрдемақы алушылар.