Жыл басынан бері Полиция департаменті өсімдіктерді қорғау және браконьерлікпен күрес саласында түрлі іс-шаралар өткізді. Тоғыз ай ішінде Маңғыстау облысында табиғат қорғау заңнамасы бойынша 31 қылмыстық іс қозғалды, деп хабарлайды mangystaumedia.kz сайты облыстық ПД сілтеме жасап.
Тіркелген қылмыстар арасында балық ресурстарын заңсыз алудың – 4 дерегі (ҚР ҚК 335-бабы); өсімдіктердің және жануарлардың сирек кездесетін және құрып кету қаупі төнген, сондай-ақ пайдалануға тыйым салынған түрлерімен заңсыз айналысудың – 26 дерегі (ҚР ҚК 339-бабы) анықталды.
Табиғатты қорғау заңнамасына сәйкес 493 әкімшілік құқық бұзушылық анықталып, хаттама жасақталды.
Оның ішінде жануарлар дүниесін пайдалану талаптарын және аң аулау қағидаларын бұзу бойынша (ҚР ӘҚБтК 382-бабы) – 332 хаттама, балық аулау және балық ресурстарын және басқа да су жануарларын қорғау қағидаларын бұзу бойынша (ҚР ӘҚБтК 383-бабы) – 73 хаттама, қалалар мен елді мекендердің аумақтарын абаттандыру қағидаларын бұзу, сондай-ақ қалалардың инфрақұрылым объектілерін бұзу бойынша жасыл желектерді жою және бүлдіру (ҚР ӘҚБтК 505-бабы) – 83 хаттама толтырылды.
Айта кетейік, бұдан өзге де құқық бұзушылықтар анықталды.
Сондай-ақ табиғатты қорғау заңнамасын бұзғандардан 935 келі 800 грамм бекіре тұқымдас балық тәркіленді.
Маңғыстау облысының Полиция департаменті өз кезегінде өңір тұрғындарын табиғатты қорғауға, табиғатты қорғау заңнамасын сақтауға шақырады, сондай-ақ браконьерлікпен айналысып заңды бұзғаны үшін қылмыстық және әкімшілік жауапкершілік көзделгендігі туралы ескертеді.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
