Боранқұл ауылының тұрғыны Сәкен Тұрниязов Құлсарыдан эвакуацияланған 50 шақты адамды үйіне орналастырған, деп хабарлайды mangystaumedia.kz.
Ал үйіне сыймаған адамдарды балалары мен туыстарының үйіне апарған. Жалпы бір әулет үйіне бас-аяғы 20 шақты отбасыны паналатқан. Сәкен Тұрниязовтың отбасы эвакуацияланған құлсарылықтарға жылы төсегін жайып, ыстық асын дайындап отыр.
- Кеше балаларымды көлікпен жіберіп, Құлсарыдағы туыстарымды үйіме алдырдым. Бір атадан тараған алыс-жақын туыстарым, құдаларым, құдамның құдасы бәрі осында келді. Өз үйіме сыймағанын екі балам мен, апамның, інімнің үйіне орналастырдық. Ең соңғысын таңғы 5-те күтіп алдық. Бұл менің азаматтық борышым. Мұндай жағдай болмасын, - деді Сәкен Тұрниязов Боранқұл ауылының тұрғыны.
Ал Құлсарыдан келген тұрғын қарғын судың ауылға лезде кіргенін айтып отыр. Сол себепті керек-жарағын жинап үлгермеген. Ол мұндай сын шақта қол ұшын созған барша маңғыстаулыққа алғыс айтты.
- Ешнәрсе жинап үлгермедік. Азаматтар судың жолын бөгеп, қорған болды. Дегенмен, қарғын суды ұстап тұра алмады. Су әп-сәтте үйімізге кіріп келгенде қашып үлгердік. Үйіне қабылдап жатқан інімізге рақмет. Боранқұл ауылына келген адамдарға көмек көрсетіп жатқан тұрғындарға да ризамыз, - дейді Айгүл Тұрниязова.
Айта кетейік, Жылыой ауданының Құлсары қаласынан Маңғыстау облысына эвакуацияланған адам саны 14 мыңнан асты.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
