Ақтаулықтар «Свидетели Иеговы» үстінен шағым айтты

Ақтаудың 12 шағын аудан тұрғындары үй аралап жүріп, діни уағыз жүргізетін адамдарға наразы, деп хабарлайды mangystaumedia.kz.

Тұрғындардың айтуынша, қолдарына планшет ұстаған адамдар келіп Құдай туралы, о дүние туралы сұрақтар қоюды әдетке айналдырған. Іле сол сұрақтарға өздері жауап беріп, сайттарын қарауды ұсынады екен.

Ашықтан-ашық жасалған үгіт-насихат жұмыстары тұрғындарды алаңдатып отыр. Діндарлардың осындай іс-әрекетіне куә болған жұртшылық әсіресе, балаларды өздеріне бет бұрғызып әкетеді ма деп қорқады.

Бейнежазбада 12 шағын аудандағы үйлердің бірінде уағыз ісін жүргізіп жүрген «Иегова куәгерлерін» көруге болады. Олар осылай 2-3 адам болып топтасып жүреді. Дін туралы емес, кейде тек тұрмысқа, отбасына қатысты сұрақтардан бастайды.

-Біз, 12 шағынаудан тұрғындары осы жайтқа наразылығымызды білдіреміз. Үнемі үй маңынан бейтаныс 2-3 адамды байқауға болады, олар әсіресе кешкі мезгілде жүреді. Балаларға да QR-кодтар таратып кеткен, кіріп қарасақ «Свидетели Иеговы» атты діни ұйым екен. QR-кодтың ішіне өтсек, сайтында діни уағыздары жарияланған. Бұл жағдай бірнеше рет қайталанды. Осыған байланысты полиция немесе өзге де орындардан бізді қорғауын, олардың тұрғындардың мазасын алмауын сұраймыз, - дейді тұрғындар.

Тұрғындардың айтуынша, олар тұрғындарды жиынға да шақырған, діни жиыны 8 шағын аудандағы кәсіподақ кеңсесінде өтеді.

Редакция құзырлы орындардан ресми жауап күтеді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.