Ақтауда бокстан Бөкенбай Сақтағановты еске алуға арналған республикалық ашық турнир басталды

23 тамыз күні Ақтау қаласында бокстан КСРО спорт шебері Бөкенбай Сәрсенұлы Сақтағановты еске алуға арналған 2006-2007 жылы туған жастар арасындағы республикалық ашық турнирі басталды, - деп хабарлайды mangystaumedia.kz сайты облыстық спорт басқармасының баспасөз қызметіне сілтеме жасап.

Республикалық ашық турнирге Өзбекстан мен Түрікменстан елдері мен Қазақстанның облыстық және қалалық құрамаларынан 100-ге жуық былғары қолғап шебері қатысуда. Жарыстың ашылу салтанатында Маңғыстау облысы спорт және дене шынықтыру басқармасының басшысы Қанат Жұмабаев және Бөкенбай Сәрсенұлының туған інісі Киікбай Сақтағанов құттықтау лебізін білдіріп, қатысушалырға сәттілік тіледі.

Сондай-ақ ашылу салтанатына бокстан әлем және Азия чемпионы Ердос Джанабергенов, Олимпиада ойындарының екі дүркін күміс жүлдегері Әділбек Ниязымбетов қатысты.

Бөкенбай Сәрсенұлы өмірінің соңына дейін бокс спортының дамуына елеулі үлес қосқан азамат. Кеңес Одағы тұсында топ жарып, КСРО спорт шебері атағын алған, тәуелсіз ел болған шақта Қазақстан Республикасының ұлттық дәрежедегі төрешісі атағын иеленді. Бапкерлік пен төрешілікті қатар ала жүріп, ерен еңбек нәтижесінде бірнеше Қазақстан Республикасының спорт шеберлері мен спорт шеберіне үміткерлерді дайындап шығарды. Шәкірттері осы күндері ұстаздарының дара жолын жалғастырып, бірі бапкерлікпен айналысып жүрсе, енді бірі төрешілікті қолға алған. Әділ ұстаз, қадірлі әке, бауырмал туыс бола білген азамат есімін ел есінде жаңғырту үшін алғаш рет 2013 жылы ұйымдастырылған турнир 2017 жылдан бастап Қазақстандық бокс федерациясының жарыстар күнтізбесіне енгізіліп, Республикалық дәрежеде өткізілетін болып шешілген.

Аталған жарыс 23-26 тамыз аралығында “Досан батыр” спорт кешенінде өтіп жатыр.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.