«Болашаққа сеніммен» өңірлік жастар лагері өтіп жатыр

Маңғыстау облысының жастар ресурстық орталығы ұйымдастыруымен «Болашаққа сеніммен» өңірлік жастар лагері салтанатты түрде ашылды. Ашылу салтанатына Маңғыстау облысының жастар саясаты мәселелері басқармасының басшысы Батырхан Қуанышбеков пен Жастар ресурстық орталығының басшысы Абылай Фазылбек келіп, қатысушыларға сәттілік тіледі, - деп хабарлайды mangystaumedia.kz сайты.

Лагерь жұмысы пандемиядан кейін қайта жанданбы.

«Жыл сайын дәстүрлі түрде өтетін өңірлік жастар лагері пандемия салдарынан тоқтап қалған еді. Биыл жастардың сұранысына сай лагерьді өткізуді жөн көрдік. Қатысушылар алдымен өтінім жіберді, соның ішінен іріктеліп, аудан, қаладан жиналған әртүрлі санаттағы 70-ке жуық жас келді», - деді Абылай Фазылбек.

Алғашқы күні жастардың қоғамдағы рөлін анықтап, өзін тануға бағытталған «Өзін-өзі бағалау» тренингі, спорттық шаралар ұйымдастырылды. Кешке қарай ақтаулық жастардың вайбын көпке креативті жеткізіп жүрген «Aktown» жастар шығармашылық бірлестігі авторлық әндерді орындады. Қатысушылар да Маңғыстаудың заманауи музыка әлеміне жаңадан қосылған жастармен қосыла ән айтып, атмосфераға толы уақыт өткізді.

Маңғыстау облысының жастар ресурстық орталығының директоры Абылай Фазылбектің айтуынша, жастар лагері әрбір қатысушыға өзін дамытып, қоғаммен байланыс орнатып, жаңа дағды үйренуіне мүмкіндік береді. Осы орайда лагерьдің екінші күні білім алуға арналды. Ол үшін Алматыдан отбасылық психолог, тренер Ақан Мергембай келіп, «Отбасы және неке құндылықтары» тақырыбында тренинг өткізді. Негізгі мақсат – жастар арасындағы отбасының рөлі мен жар таңдаудың маңызын түсіндіру.

Аталған тренингтен бөлек жастар Бибігүл Шайхиеваның «Қаржылық сауаттылық» тақырыбындағы семинарға қатысты. Онда қаржы туралы қарапайым түсініктен бастап көптеген маңызды ақпарат айтылды. Қаржының жұмсалуын жоспарлау, оны тиімді жұмсау және жинау тұрғысынан пайдалы кеңестер айтылды. Жастар өз кезегінде парактикалық жұмыстарға белсенді араласып, қаржы туралы стереотиптен арылды.

Тың ақпаратқа толы тренингтен соң жастар «Көңілді старт» тимбилдингіне қатысты. Әрі қарай қатысушылар топ болып, «Talent Show»-да сынға түсті. Осылайша өңір жастары бойдағы талантты сыртқа шығарып, бір-біріне мерекелік көңіл-күй сыйлады. Сана жаңғырған, таланттар танылған күн көңілді би кешімен аяқталды.

Бүгін лагерь қатысушылары облыс әкімінің орынбасары Ұлықбек Тналиевпен кездеседі.

Жұлдыз ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.