Шетпе-Қызан-Ақшымырау автожолы жөндеуден өтті

Бұл туралы Маңғыстау облысының қоғамдық коммуникация орталығында өткен брифингте Маңғыстау ауданының әкімі Тілек Көшмағанбетов хабарлады.

Спикердің айтуынша, 2021 жылы бірнеше жолға жөндеу жүргізілген.

Атап айтсақ, 21 шақырымды құрайтын Шетпе-Тиген-Қызан автокөлік жолына орташа жөндеу жасалды. Жоба құны – 333,457 млн.теңге. Құрылыс жұмыстары толықтай аяқталып, қабылдау акті жасақталды. Бұдан бөлек, 14,7 шақырым құрайтын Қызан-Ақшымырау автокөлік жолы да жөнделді. Жоба құны – 363,025 млн.теңге. Құрылыс жұмыстары толықтай аяқталды. Оңды демалыс орнына кіре беріс жолы да жасалды,-деді Тілек Көшмағанбетов.

Жалпы, ауданда 294 шақырым автомобиль жолдарының 245 шақырымы асфальт-бетон қосындысы бар қатқыл табанды, ал 49 шақырымы жартылай қиыршық тасты құрайды. Автокөлік жолының 71% – жақсы, 12% – қанағаттандырарлық, 17% – нашар жағдайда. 2021 жылға – 146,710 млн.теңге бөлініп, бекітілген кестеге сай жұмыстар жүргізілді.

Алдағы уақытта Шетпе-Қызан автокөлік жолының 49-85 шақырымын (Тасмұрын-Мәстек аралығы) және 85-110 шақырымын (Мәстек-Қызан аралығы) қайта құрылымдау жоспарланып отыр. Жоба құны – 5, 742 млрд.теңге. Мердігер мекеме «Аltynzhol Group» ЖШС. Құрылыс жұмыстары жалғасуда. Жұмысты толығымен аяқтау үшін 2 млрд.теңгеден астам қаржы қажет.

Бұдан бөлек, Жыңғылды ауылы жолының 5,1 шақырымына дейін жөндеу жасалуда.
Жоба құны – 236,9 млн. теңге. Мердігер: «Ақжол+К» ЖШС. 2021 жылы құрылыс жұмыстарына 122,232 млн.теңге қаржы бөлініп, 5,1 шақырым автокөлік жолының негізі дайындалып, ПГС, ШПГС төсеу жұмыстары аяқталды. Құрылыс жұмыстарын осы жылы толықтай аяқтау жоспарлануда.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.