Биыл «Yessenov University» теңіз академиясы алғашқы түлектерін шығарады

Биыл «Yessenov University» теңіз академиясы өзінің тұңғыш түлектеріне диплом табыстамақ. Бұл туралы Қоғамдық коммуникациялар орталығында өткен брифингте «Yessenov University» президенті Берік Ахметов мәлімдеді, деп хабарлайды mangystaumedia.kz.

Оның айтуынша, «Yessenov University» теңіз мамандарын даярлау бағыты бойынша мемлекеттік инвестициялық жобамен 15 өңірлік жоғары оқу орындары-академиялық артықшылық орталықтарының бағдарламасына енді.

«Бұл жоба университеттің сала бойынша ғылыми тартылыс орталығына айналуға мүмкіндік береді және Қазақстан Республикасының «IMO - Халықаралық теңіз ұйымының ақ тізіміне» енуіне ықпал етеді. Жобаның тікелей нәтижесі теңізшілерді даярлау, дипломдау және вахта жұмысын атқару туралы халықаралық конвенцияның (ПДМНВ 78/95 және одан әрі Манила түзетуімен) талаптарына сәйкес сертификатталған білікті кадрларды даярлау жөніндегі теңіз академиясын жаңғырту және трансформациялау негізінде Каспий маңы мемлекеттерінің ғылыми-білім беру орталығын құру болмақ. Бұл Қазақстан азаматтарының кемелер экипаждарындағы үлесін арттыруға мүмкіндік береді, өйткені сол кезде Қазақстан Республикасы берген дипломдарды халықаралық теңіз ұйымының конвенциясына қосылған басқа елдер де мойындайтын болады. Аталған жоба шеңберінде құрылатын Ғылыми-білім беру орталығының базасында жүзеге асырылатын зерттеулердің бағыты айқын: су индустриясына арналған жаңа технологиялар, су көлігін басқару және бақылау жүйесін оңтайландыру», - деді Берік Ахметов.

Бұдан басқа, ғылыми-білім беру орталығы кеме қатынасы компанияларына, порттарға, білім беру және оқу орталықтарына су көлігінің жоғары білікті кадрларын даярлау бойынша қызметтер көрсететін болады.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.