Маңғыстауда қан тапшылығы сезілуде

Бұл туралы Маңғыстау облысы денсаулық сақтау басқармасының баспасөз қызметі хабарлады.

Маңғыстау облысы қан орталығына келуші ерікті донорлар саны күрт азайды. Қан құю өмірге сәби келгенде, жол-көлік оқиғасына түскендерге және тағы апаттардан зардап шеккендердің өмірін сақтайды, сонымен бірге ағзасы ауыр аурулармен, атап айтқанда, қатерлі ісікпен күресетін адамдарға ауадай қажет.

Бүгінде теріс факторы бар бірінші, екінші және үшінші топтағы қанның болмауы біраз қиындық туғызып отыр. Сондай-ақ тромбоциттер донорлары қажет. Әрбір адам облыстық қан орталығына келіп донор бола алады. Алайда сауапты іске ат салысуға дайын тұрған белсенділер азайған.

ДДСҰ коронавирустың тарауын пандемия деп жарияланған күннен бастап, барлық елдерде сақтық шаралары мықтап қолға алынды. Мемлекет басшысы Қасым-Жомарт Тоқаев елде төтенше жағдай жариялады. Маңғыстауда сәуірдің 3 мен 15 аралығында карантин енгізілді. Яғни көшеге шығушылар азайды. Бірақ қанға сұраныс күн санап арта түсуде. Сол себепті облыстық қан орталығы ерікті донор болатын жандарды күтеді.

Маңғыстау облысы қан орталығы қан дайындау бөлімінің меңгерушісі Гүлнафис Кунашева қан тапсырып тұру адам ағзасына пайдалы екенін айтады. Әсіресе қан-тамырлар ауруына шалдықпауға септігін тигізеді және қан қысымын төмендетеді.

«Қанды үйде жатып онлайн режимде тапсыра алмайды. Сол себепті қан орталығына аяқтай келуге тура келеді. Біздің орталық демалыссыз жұмыс жасауда. Сағат таңертеңгі 09.00 мен күндізгі 13.30 аралығында келуге болады. Донор болғысы келетіндер болса күні бұрын дайындалып келгуге кеңес береміз. Кешкі сағат 18.00-ден кейін майлы тамақ жеуге болмайды. Сұйық тағамды ішіп, жақсы демалып келген дұрыс. Таңертең сүтсіз шәй ішуге және піспенан жеуге болады. Әрбір келуші бетперде, бахила және медициналық қолғаппен қамтамасыз етіледі», - дейді ол.

Негізінен қан және оның компоненттері облыстық және қалалық перинаталдық орталықтарға, онкологиялық диспансер, облыстық және көпбейінді балалар ауруханасында ем алып жатқан науқастарға аса қажет.

Қан тапсыру адамның ағзасына оң нәтиже береді. Қорқатын ештеңесі жоқ. Кейбір адамдарда қате түсінік бар, яғни қан тапсырғанда иммунитет түсіп кетеді деушілер көп, алайда қан тапсырған адамның иммунитеті керісінше көтеріледі. Адам бойында жаңа клеткалар пайда болып, қан жаңарады. Сол себепті сауапты істен құр қалмайық.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.