7-12 - фастфуд әуесқойлары арасында ең танымал үйлердің бірі. Дегенмен Ақтаудағы осы үйдің айналасында тұратындар өз наразылықтарын білдіруде. Өйткені тұрғындарды осыған дейін бітпейтін шу мен түтіннің иісі алаңдатса, енді тұрғын үйдің жай-күйі мазалайды, деп хабарлайды mangystaumedia.kz сайты.
Тұрғындардың айтуынша, үйдің негізгі қабырғалары, яғни көтергіш қабырғалардың бұзылуы олардың өміріне қауіп төндіреді. «Кафенің кеңейту үшін қабырғаларды алып тастау қайғылы жағдайға әкелуі мүмкін», - деп есептейді олар.
- «7-12-дегі барлық кафелерді бақылауға алыңыз. Жақында үй құлауы мүмкін. Газ құбырлары тот басқан. Ал бірінші қабаттағы барлық көтергіш қабырғалар түгел алынып тасталған», - дейді тұрғындар.
«Осы ғимараттағы пәтерлердің тұрғындары шу, май мен түтін иісінен терезелерін аша алмай келеді. Енді міне қауіпсіздігіміз үшін де алаңдаймыз. Өйткені үй кез келген сәтте жермен жексен болуы мүмкін», – дейді үй тұрғыны.
Маңғыстау облысы бойынша мемлекеттік сәулет-құрылыс бақылау департаменті хабарлағандай, «SALAM BRO» иесіне қатысты жоспардан тыс тексеру жүргізілді.
Нәтижесінде ҚР ӘҚБтК-нің үш бабы бойынша әкімшілік айыппұл салынды.
– 316-баптың 1-бөлігіне сәйкес – Техникалық регламенттерде белгіленген талаптарды қоспағанда, объектiлердi және олардың кешендерін, жобалау (жобалау-сметалық) құжаттамасынсыз не сараптама жүргізу талап етілетін, белгiленген тәртiппен сараптамадан өткiзiлмеген жобалау (жобалау-сметалық) құжаттамасы бойынша салу (реконструкциялау, реставрациялау, кеңейту, техникалық қайта жарақтандыру, жаңғырту, күрделi жөндеу), 322-баптың 2-бөлігі –«Ғимараттардың берiктiгiнiң және орнықтылығының толық жойылуына (қирауына) әкеп соққан немесе әкеп соғуы мүмкiн дәл сол әрекеттер , жеке тұлғаларға – 80, лауазымды адамдарға, шағын кәсіпкерлік субъектілеріне немесе коммерциялық емес ұйымдарға – 180 орта кәсiпкерлiк субъектiлерiне – 250, iрi кәсiпкерлiк субъектiлерiне - 500 АЕК мөлшерiнде айыппұл салуға әкеп соғады. Сондай-ақ 323-бапта - «Техникалық регламенттерде белгіленген талаптарды қоспағанда, белгiленген тәртiппен пайдалануға берілмеген объектiлер мен кешендердi пайдалану” бойынша жіберілген заң бұзушылықтарды жою туралы ұйғарым жіберілді,- деп атап өтті Маңғыстау облысы бойынша мемлекеттік инспекциясы.
Ал аталған кәсіптік нысан иесі бұйрықта көрсетілген талаптарды орындамағандықтан, мемлекеттік орган ҚР ӘҚБтК-нің 462-бабының 3-бөлігімен әкімшілік хаттама толтырып, сотқа жолдаған. Сот шешімі бойынша қосымша әкімшілік шаралар қабылданады, оның ішінде тіпті қызметті тоқтата тұру да қарастырылған.
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
