Ақтауда теңіз жағалауында Абай өлеңдерін оқыды
[ 2019 ] 22 шілде, 10:44 | Жаңалықтар
20 шілде күні Абай атындағы мәдени-демалыс кешенінің ұйымдастыруымен амфитеатр алаңында Абай Құнанбайұлының 175 жылдығы мен Абай атындағы МДК 45 жылдығы аясында қала тұрғындары және қонақтарымен кездесу өтті, - деп хабарлайды mangystaumedia.kz сайты.
Шара барысында жиналғандар Ұлы ақынның шығармаларын оқып, әндерін шырқады. Рухани кешке "Шабыттан, Жаса,Жарқыра" мега жобасының финалисі Жомарт Маратовтың "Самға" жанұялық ансамблі қолдау көрсетті. Отбасылық топ мүшелері әр түрлі аспаптарда Абай шығармаларын орындап, көрермен көзайымы болды. Теңіз жағалауы, ашық аспан астында өткен рухани кеш жиылғандардың көңілінен шықты. Тұрғындармен қоса Алматы, Атырау және ақынның туған жері Семей қаласынан келген қонақтар шараға белсене атсалысты. Бірге ән айтып, би билеп, керемет көңіл көтерді.
[embed]https://www.youtube.com/watch?v=y4tFq8jRKs8&t=2s[/embed]
Абай атамыз қазақтың Ұлы ақыны және жазушысы. Бүгінгі кештің оған арналғанына өте қуаныштымын. Кеш қызықты болды. Тағы да осындай кеш ұйымдастырылса қуана қуана қатысар едім. Барша қазақты Ұлы ақынның 175 жылдық мерейтойымен құттықтаймын, - дейді Абай Құнанбайұлының жас оқырманы Абылхасан Ерқуатов.
Мұнайлы ауданының тұрғыны Абылхасан Ерқуатов Абайдың өлеңін оқығандардың арасында ең кішісі. Ол Мұнайлы ауданы № 11 мектебінің оқушысы. Мектеп табалдырығын аттағаннан бастап Ұлы ақынның шығармаларымен сусындаған. 3 сыныпқа аяқ басқан Абылхасан Абайдың біршама қара сөздері мен өлеңдерін жатқа айтады.
[embed]https://www.youtube.com/watch?v=QDk3ifhcjRg[/embed]
Биыл қазақ халқы үшін мерекелі жыл. Ойшыл, гуманист, хакім Абайдың 175 жылдық мерейтойы. Сонымен бірге жерлесіміз Әбіш Кекілбайұлының 80 жылдық мерейлі тойы. Осыған орай, көптеген мерекелік шаралар ұйымдастырылып жатыр. Абайдың шығармаларын оқимын дегендер үшін еркін алаңша жасалды. Тұрғындар бей жай қарамай ақынның өлеңдері мен әндерін орындағаны көңіл қуантты, - дейді Гүлжазира Алдашева Ақтау қалалық мәдениет және тілдерді дамыту бөлімінің басшысы.
Махаббат НҰРЖАНҚЫЗЫ
Суреттер мен бейнежазбаны түсірген Талант ҚҰСАЙЫН
[gallery td_select_gallery_slide="slide" ids="83221,83222,83223"]
880
Маңғыстау Медиа
Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.
