50-ге жуық тұрғын гепатологтан тегін кеңес алды

Маңғыстау облыстық көпбейінді ауруханасының гепатологтары ашық есік күнін өткізді, деп хабарлайды mangystaumedia.kz сайты МОКА баспасөз қызметіне сілтеме жасап.

ДДҰ мәліметтері бойынша әлемде шамамен 2 миллиард адам, яғни әрбір үшінші тұрғын вирустық гепатитпен ауырады. 325 миллион адам В немесе С вирустық гепатитімен өмір сүреді, жыл сайын 900 мың адам В вирустық гепатитінен қайтыс болады.

– Шара Дүниежүзілік гепатитке қарсы күрес күніне орай ұйымдастырылды. Бүгінгі күні 50-ге жуық науқасты қабылдадық, олардың жартысы бауырдың жанама эластографиясына – FibroScan аппаратына жіберілді. Бүгінде өңірде В, С вирусты гепатиттері мен бауырдың майлы аурулары өзекті болып отыр, – дейді Маңғыстау облыстық көпбейінді ауруханасы гепатологиялық орталығының гепатолог-дәрігері Айгерім Сақтаған.

МОКА базасында гепатологиялық орталық жұмыс істейді. Бұл аймақтағы күрделі бауыр ауруларына диагностика жасап, емдейтін жалғыз орталық. Сарапшылар жылына бір рет гепатологтың профилактикалық қабылдауынан және дәрігер тағайындайтын сынақтардан өтуге кеңес береді.

– Облыстық аурухананың гепатология орталығы дертпен күресуде алдын алу скринингтік тексерулер мен емдеу шараларына көбірек көңіл бөліп жатыр. Біздің дәрігерлер Қазақстан Республикасы Денсаулық сақтау министрлігі бекіткен ереже бойынша жұмыс істейді. Сондықтан емделушілер емнің салдарына жауап бермейтін жеке ұйымдарға емес, бізге жүгінгені маңызды,- дейді МОКА консультативтік-диагностикалық емханасының меңгерушісі Жанар Байманова.

Айта кетейік, Маңғыстау облысының тұрғындарын қабылдауды штаттан тыс бас гастроэнтеролог П.К.Мулдашева және гепатолог-дәрігер А.Е.Сақтаған мен Р.К.Аташева жүргізді.

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.