Маңғыстауда  наурыз бойы «Жомарт жүрек» акциясы өтеді

Қазақстан халықтары ассамблеясының «Мәңгілік ел – бір ел, бір тағдыр» тақырыбында өткен 22-сессиясының ашылу рәсімінде Н.Назарбаев 1 наурызды Алғыс айту күні деп белгіледі. Үш жылдан бері бұл күні халқымыздың бір-біріне деген сүйіспеншіліг мен мейірімін білдіретін мереке ретінде қалыптасып үлгерді.

Осы орайда облыс әкімі Е.Тоғжановтың бастамасымен «Жомарт жүрек» акциясы жарияланды. «Асар» қайырымдылық шарасының жалғасы іспеттес шара бір ай бойы облыс көлемінде атап өтілмек.

Бүгін оның алғашқы легі облыстық мүгедектер мен қарттар үйінде бастау алды. Аймақ басшысы мұндағы тұрғындарды арнайы құттықтап, сыйлықтарын табыстады.

«Елдің алғысына бөленіп, жүрекке жылу сыйлау үшін «Жомарт жүрек» қайырымдылық акциясын бастауды ұсынамын. Өздеріңіз жақсы білетіндей, биыл жыл басында облыс бойынша «Асар» қайырымдылық шарасын бастаған болатынбыз. Нәтижесінде, 30 миллионнан аса қаржы жиналып, үш жарым мың отбасыға (3500) көмек көрсетілді. Бұл бастама тек бұнымен тоқтап қалмайтынын айтқан болатынмын. Ендеше,  бүгін міне, игі іс дәл осы шарада, дәл осы уақытта салтанатты түрде жалғасын таппақ», - деді облыс әкімі Ералы Тоғжанов.

30 күнге жалғасатын «Жомарт жүрек» қайырымдылық акциясының мақсаты – халықтың әлеуметтік осал топтардың қажеттілігін өтеу, қол ұшын созу. Аз қамтылған, мүгедек балалары бар жанұяларға, мүмкіндігі шектеулі жандарға және ҰОС ардагерлеріне көмек көрсету.

-Мұнда өмір сүру өте қолайлы, барлық жағдай жасалған. 4 жылдан бері тұрып келемін. Бүгін  бізді құттықтап келіп жатқан басшыларға, азаматтарға үлкен алғысымды айтамын. Бірге көңіл көтеріп, сый-сияпатын да әкеліп жатыр. Баршаңызға мықты денсаулық, бақытты өмір тілеймін. Көктемнің алғашқы күнімен қатар келген Алғыс айту мерекесі құтты болсын», - деп қарттар үйінің тұрғыны Тайсия Богородская.

Сонымен қатар, 1 ай бойы «Жомарт-Жүрек» экспозициясымен арнайы автокөлік облыстың екі қаласы мен барлық ауданын аралайды. Көмекке мұқтаж жандар өздерінің сұранысын жазып, арнайы жәшікке сала алады. Наурыз айында бүкіл өңірде «Жомарт-Жүрек» қайырымдылық марафоны аясында 20-дан астам іс-шара өтеді.

Теңге БЕКМҰРЗАЕВА

Суреттерді түсірген Серік МАЙЕМЕРОВ

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.