Наурыз айының әр күні мерекеге арналмақ

Бүгінгі баспасөз отырысында МО Мәдениет басқармасының басшысы Пәния Сармурзина осылай деді. Алғашқы күні алғыспен басталатын ай биыл толығымен мейрамға арналмақ. Мұндағы мақсат – Қазақстан халқын түгел қамту.

Бір ай бойы мерекені тойлап қана қоймай, мәні мен мақсатын түсіндіріліп, насихатталмақ.

Халық бір-біріне, туған жерге, елге, ата-анаға, дос-жаранға алғыс айтатын атаулы күн – 1 наурыз биыл үшінші рет тойланғалы отыр. Оның аясында осы жылы облыс көлемінде «Жомарт жүрек Асар» акциясы бастау алды. Бұл акция облыстың барлық аудан, қалаларында өтпек. Алғашқысы облыстық қарттар үйінде ұйымдастырылмақ.

- Наурыз айының әр күніне белгіленген шаралар ұлттық құндылықтарға арналады. Дәстүрге, ұлттық киімдерге, білімге, спортқа, қайырымдылыққа, балаларға базарлық секілді шараларға ден қойылмақ. Сонымен қатар халықаралық аналар күні, Амал мерекесі, 22 наурыз да үлкен ауқымда атап өтіледі. Амал мерекесінде 13-14 наурыз күндері Отпан тарихи-мәдени кешенінде республикалық деңгейде ауқымды шара өтеді. Оған тек маңғыстаулықтар ғана емес, еліміздің түкпір-түкпірінен азаматтар шақырылады. Белгілі жыршы-термешілер, өнерпаздар қатысады. 53 киіз үй тігіледі, - дейді Пания Сармурзина.

Сондай-ақ 13 наурыз күні "Отпан" тарихи-мәдени кешенінде дөңгелек үстел өткізу жоспарланған. Ол «Амал – мереке, бірлік бастауы» деп аталады. Яғни осы мейрамның мән-мағынасына, мазмұнына арналған жиын болмақ. Оған республикаға білгілі тұлғалар, ғалымдар қатысады.

Бұдан өзге спортттық шаралар, ұлттық ойындар,  облыстық М.Өскінбаев атындағы филармонмияның әртістері дайындаған концерттік бағдарлама да көпшілік назарына ұсынылмақ.

Наурыз мейрамы қарсаңында Жаңа жылды қарсы алу шарасы, «Бауырсақ пати», «Домбыра пати», ұлттық киімдер көрмесі, «Ақ дастарқан» сынды шаралар өткізу жоспарланып отыр.

Өтетін шараларды тамашалап қана қоймай, оларға әрбіріміз тікелей атсалысуымыз қажеттігін баса айтты басқарма басшысы.

Айта кетейік, ертең айтылған атаулы шаралар басталады. Таңғы сағат 9-да теңіз жағалауында жүгіруден марафон өтеді. Есенов университетінде арнайы дайындалған Алғыс ағашына  көпшілік өз тілектерін жазады. Флешмоб, мектеп қабырғаларындағы түрлі шаралар да жоспарда.

Теңге БЕКМҰРЗАЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.