Жаңаөзен қаласында «Жастар театры» құрылды

Тәуелсіздіктің 30 жылдығы аясында Маңғыстау облысының мәдениет, тілдерді дамыту және архив ісі басқармасы мен Н.Жантөрин атындағы музыкалық-драма театрының қолдауымен Жаңаөзен қаласында «Жастар театры» құрылды, деп хабарлайды mangystaumedia.kz МО ҚКО сілтеме жасап.

Облыстық мәдениет, тілдерді дамыту және архив ісі басқармасының басшысы Пәния Сармурзинаның айтуынша «Мұнайшы» мәдениет үйінің жанынан құрылған ұжым жас мамандармен қамтылған.

«Театрдың бағасын ең бірінші беретін кім, ол көрермен. Қазіргі уақытта, Н.Жантөрин театрындағы қай қойылымның да өз көрермені бар. Осы аптада шығарылған қойылымды, келесі аптада сұраушылар өте көп. Біз оны мақтанышпен айта аламыз. 2004 жылы алғаш рет құрылған облыстағы Н.Жантөрин атындағы музыкалық-драма театры да осылай өз бастауын алып, жұмыс бастаған еді. Бүгінде республика бойынша алдыңғы қатарда. Міне, жаңадан құрылған бұл театрдың жұмысына сәттілік тілеп, жаңа деңгейден бой көрсетеді деген сенімдеміз", - деді Пәния Сармурзина.

Алдағы уақытта жас әртістер өнер академиясының білікті мамандармен өзара тәжірибе алмасады. Өнер ұжымы өскелең ұрпаққа рухани құндылықтарды дәріптеп отандық және әлемдік қойылымдарды сахналауға, мәдени-эстетикалық әлемнің, таным-тағылымын, шығармашылық әлеуетін жетілдіруге күш салмақ.

Суреттерді түсірген Талант ҚҰСАЙЫН

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.