Ақтауда көркемсурет галереясы өртенді

Ақтаудағы 11 шағынауданда орналасқан көркемсурет галереясы өртке оранды. Өрт салдарынан галереядағы суреттер мен тұрмыстық техника жанып кеткен, - деп хабарлайды mangystaumedia.kz сайты.

Оқиға кеше сағат 20:39 шамасында 11 шағынаудан 7 үйде болған. «101» кезекшісінің бақылау бөліміне қоңырау түскеннен кейін арнайы мамандар жедел оқиға орнына барып, сағат 21:49-да өртті сөндірген.

Маңғыстау облысы Төтенше жағдайлар департаменті бастығының орынбасары, азаматтық қорғау подполковнигі Мұрат Мұхановтың айтуынша, зардап шегушілер жоқ. Тұрғын үйдің жоғарғы қабатындағы 25 адам эвакуацияланды. Оның бесеуі – бала.

«Дүкеннің жалпы ауданы – 500 шаршы метр, соның 90 шаршы метрі жанып кетті. Өртті сөндіруге сегіз техника мен 21 адам жұмылдырылды. Қазіргі таңда өрттің шығу себебі мен шығыны анықталып жатыр», - дейді Мұрат Мұханов.

Айта кетейік, Маңғыстау облысында жыл басынан бері 103 өрт оқиғасы тіркелген. Осы уақытқа дейін 6 адам газдан уланып қайтыс болса, екі адам өрттен зардап шеккен болатын.

Жұлдызай ҚАЛИЕВА

Маңғыстау Медиа

Редакциялық пікір мақала авторлары мен оқырмандардың пікірлеріне сәйкес келмеуі мүмкін. Жазба және пікірлердегі ақпараттың дұрыстығы үшін авторлардың өздері жауапты.